Vihreä pussi

Hetelmäkuoret, kahvisumput ja muu ruokajäte pittää heittää vihrehään pushiin, niin sanothuun biopushiin. Biopussi laitethaan sitte ruskehaan jäteastihaan. Ette pussit säilyvä maholisiman kauon, net pittää säilyttää pimeässä ja viileässä paikassa.

Paitti ette saapi arvokhaita resurssija biokaasuna ja biolantana eli biosontana, ko sie sortteeraat ruokajätheet, niin kans restijätheen polttaminen tullee tehokhaamaksi ko ei ole märkää ruokajätettä.

Melkein kaikki ruokajätheet saahan laittaa vihrehään pushiin, mutta oon muutamia poikkeuksia. Esimerkiksi munankuoria ei saa heittää vihrehään pushiin ko kuori häirittee mätämisprosessia. Näitä seuraavia tuotheita ei kans saa heittää vihrehään pushiin:

• Kissanhiekkaa
• Pähkinänkuoria
• Haaroja ja oksia
• Kukkamultaa

Uuet pussit

Alkuvuesta teile tuohaan uuet pussit. Oon suuniteltu ette net kestävä vuen aijan, mutta jos ne loppuva kesken voit hakea lissää BDX:stä.

Jäätyykös ruokajätepussi kiini?

Ko lämpötila vaihtelee plussa-astheista miinuksheen oon riski ette ruokajätepussit jäätyvä kiini ruskehaan astihaan. Jos jäte jäätyy oon riski ette jätettä ei tyhjennetä lainkhaan eli vain osithain.

• Vähenä riskiä ette ruokajätepussit jäätyvä kiini astihaan, seuraavila vinkilä:
• Laita aviisin astian pohjale.
• Anna ylimääränen neste valua poijes ennen ko laitat sen ruokajätepushiin.
• Täytä ruokajätepussin ette vähiinthääns neljäsosa oon täyttämättä.
• Sulje pussin kunnola.
• Jos oon maholista niin jätä pussin vähäksi aijaksi ulos ennen ko laitat sen jäteastihaan (voit esimerkiksi puristaa pussin jäteasian kannen alle taikka laittaa sen hinkhiin, jossa oon kansi).
• Jos pussi kuitenki jäätyy kiini, niin huiskuta ja kolista astiaa siivosti ette jäätynheet pussit irtoava.
• Varmista ettei astia ole jäätyny kiini ennen tyhjenyspäivää ja jos oon tullu lunta ympärile niin luo poijes sen.
• Piä astia puhthaana.

Uutinen alkaen 1 janyaari 2024

Uusi EU-laki astuu voihmaan

Ensimäinen päivä janyaaria 2024 uusi laki astu voihmaan, sen mukhaan niin privaattihenkilöt ko fööretaakit pitävä sortteerata ruokajätheet ja jättää net kunnale kierätettäväksi. Vieläki oon maholista hoitaa ruokajätheen itte, jos sulla oon kuumakomposti ja hoijat ruokajätheen sinun omala fastiheetila. Jos haluat tehä näin, sinun pittää ilmottaa kompostista pyki- ja miljööosastole ja samala hakea dispansia ette vapautethaan ruokajätheen toimittamisesta kunnale.

Poikkeukset

Ainoa poikkeus mitä privaattihenkilöitten ei tartte sortteerata ulos ruokajätheestä oon käytännön syistä nestemäinen ruokajäte. Tämä ei kuitenkhaan koske nestemäistä ruokarasvaa, jonka pittää sortteerata ja jättää kierätyssentraalin erityishiin astioihin. Lue lissää kautta www.kalix.se/ruokarasva

Mitäs tapahtuu jos et sortteeraa ruokajätettä?

Ruokajätheen sortteeraamisen eistämiseksi kunnanvaltuusto oon päättäny ette nostethaan vuen 2024 jätetaksan restijätheen (tavalisen jätheen) painomaksua vain indeksikorotuksela. Samala otethaan käythöön 500 kruunun väärinsortteeraamismakson, jos jäte päättyy väährään asithaan. Ennen ensimäisen makson perimistä lähätethään informašuunipreivin, jossa selivitethään jos oon kyse väärinkäsityksestä tai jos sie kyntinä tarttet apua jossaki asiassa. Jos virhheet jatkuva, väärinsortteeraamismakso tullee reenhollninkilaskun kautta.

Ruokarasva

Alkaen 1 janyaaria 2024 nestemäisen ruokarasvan sortteeraaminen oon pakollista niin privaattihenkilöile ko fööretaakile.

Ruokajäte ja nestemäinen rasva

Nestemäinen rasva oon ruokajäte ja sen oon sortteerattava. Nestemäistä rasvaa oon kuitenki käytännön sysitä hankala laittaa vihrehään biopushiin. Tämän takia lainsäätäjä oon erottannu ruokajätheen ja nestemäisen rasvan toisisthaan ja selventäny ette kans rasvan pittää sortteerata kierätyksheen. Ennen 1 janyaari oli tavalista ette rasva sortteerathiin poijes, mutta se laitethiin restijätheesheen (vihrehään astihaan).

Kaihnuun kunnala on alkaen 1 janyaaria 2024 sopimus Quatra-yhtiön kansa, joka oon nestemäisen rasvan kierätysfööretaaki. Ko sie olet saanu kokhoon tarpheeksi rasvaa, voit jättää sen kierätyssentraalhiin niinhin punashiin Olioboxhiin. Ko ruokajäte oon kunnallista jätettä sen voipi vain jättää kunnale. Mikhään muu aktööri ei saa hakea jätettä sulta.

Mitäs kerätylle öljyle tapahtuu?

• Quatra muuttaa ruokaöljyn kestävien polttoaihneitten ainesosiksi (peräti 90% vähempi kooltioksiitiä).*
• Rasvarestistä tullee biokaasun perusta.
• Muutjätevirrat niin kop lasti, klasi ja metalli pesthään ja sortteerathaan kierätystä varten.
• Vesi puhistethaan biolookisesti.

Mites tehhään?

Ko olet käyttäny ruokaöljyä ja jääpi yli isompi määrä, niin kaaja sen suljettavhaan astihaan. Voit käyttää vanhaa ruokaöljypulloa, klasipurkkia tai mitä sulla nyt oon kotona. Tärkeintä oon ette se oon tiivis. Ko astia oon täynä sie voit jättää sen Kaihnuun kierätyssentraalhiin siihen Olioboxhiin.

Pienemät määrät

Jos sulla oon pienempi määrä rasvaa, jonka voipi pyhkiä paperila sinun ei tartte laittaa sitä eriksheen. Laita sen sijhaan paperin vihrehään biopushiin ja sen jälkheen ruskehaan jäteastihaan niin se mennee kierätyksheen sen kautta.

*Tieto Quatralta